Президентимизнинг Қўқон шаҳрига қилган ташрифлари давомида берилган топшириқлар ижроси доирасида тез фурсатларда барпо этила бошлаган "Янги Ўзбекистон" мавзеси шаҳримиз қиёфасини буткул ўзгартирди. Минг йиллик тарихга эга Қўқон - энди шаҳарча эмас замонавий мегаполис, халқаро туризм ва савдо марказига айланиб бормоқда. Шаҳримизда икки дона тўққиз қаватли бино бўлар эди, кўп қаватли уй деганда кўз олдимизга собиқ иттифоқ даврида қурилган икки нари борса тўрт қаватли уйлар келар эди. Аҳоли учун арзон, қулай ва замонавий уйларга эҳтиёж катта эди. Бугун таратадиган ҳиди билан йиллар давомида ҳамшаҳарларимизни жиғига теккан собиқ "Ёғ-мой" комбинати ўрнида жаҳондаги энг сўнгги қурилиш технологиялари асосида янги мавзе, йўқдан бор бўлиб, кўп қаватли уйлар салобати билан ўниб ўсиб муҳайё бўлди. Инсон ҳаёти учун зарур барча қулайликлар, боғча, мактаб, хизмат кўрсатиш ва савдо нуқталарини ўз ичига жамлаган уй-жой мажмуаси Қўқон аҳолиси учун энг йирик ва кутилган туҳфа, замонавий хонадонлар ҳақидаги орзуларимизни ушалиши бўлди.