Qo‘qon shahridagi korxonalarda faoliyat yuritayotgan ishchi-xizmatchilar xalqaro standartlar darajasida kasbiy ta’lim oladi Qo‘qon shahrida faoliyat olib borayotgan texnikumlar va yetakchi korxonalar mutasaddilari ishtirokida bo‘lib o‘tgan muhokamada Qo‘qon shahar hokimi Marufjon Usmonov ham ishtirok etdi. Marufjon Usmonov shahrimizda Prezidentimizning "Kasbiy ta’lim tizimida islohotlarni amalga oshirish chora-tadbirlari to‘g‘risida"gi qarori ijrosini ta’minlash, yoshlarni kasb hunarlarga yo‘naltirishda biznes vakillari ehtiyojlarini ta’minlash va ayni paytda mehnat bilan band bo‘lgan ishchilarni texnikumlarda o‘qitib, kasbiy bilimini xalqaro ta’lim standartlari darajasiga yetkazish masalalariga e’tibor qaratdi. Samimiy muloqot chog‘ida tadbirkorlik subyektlari malakali kadrlarga ehtiyoj sezilayotgan yo‘nalishlar, kadrlar siyosatida yuzaga kelayotgan muammolar xususida ma’lumot berib, Prezident qarori, nazarda tutilgan imtiyozlar yuzasidan o‘zlarini qiziqtirgan savollariga javob oldilar. Muzokaralar natijasiga ko‘ra maktab o‘qivchilarini kasb-hunarga qiziqtirishga ishlab chiqarish korxonalarini yanada kengroq jalb etish, texnikumlar tomonidan korxonalarda mavjud talablarni muntazam o‘rganishni tashkil etish va umuman olganda ta’lim va biznes sohasi vakillarining malakali kadrlar yetishtirish va mehnat bozorida talab yuqori bo‘lgan sohalarga o‘qitish hamda qayta o‘qitish, dual ta’limni rivojlantirish borasidagi o‘zaro hamkorlikni mustahkamlashga kelishib olindi.