Qo‘qon shahar hokimi Marufjon Usmonov mutasaddilar bilan muloqotda bo‘lib, O‘rda maydonida Qo‘qon shahrining gastronomik turizm imkoniyatlarini to‘liq namoyon etish; Qo‘qon palovi, Qo‘qon holvasi, Qo‘qon patir, ko‘cha osh kabi mahsulotlarni tayyorlab, mehmonlarga tortiq etish bo‘yicha ko‘rsatmalar berdi. Xalqaro hunarmandlar ko‘rgazmasi qatorida mehmonlarga ayron, tabiiy anor va tarvuz sharbatini taklif etilib, yurtimizda yetishtirilgan meva va poliz ekinlarini tatib ko‘rishlari uchun sharoit yaratiladi. Mas’ullarga “Mehrigiyo” va “Mingdon” ziravorlar va dorivor o‘simliklari alohida paviloni va ko‘rgazma savdosini tashkil etish yuzasidan ham topshiriqlar berildi. Qo‘qon shahridagi musiqa va san’at maktablari festival kunlari milliy cholg‘uchilik asboblari imkoniyatlarini namoyish etib, milliy kuy-qo‘shiqlarimizni ijro etadigan sayyor guruhlar tashkil etib, festival mehmonlarini xushnud etadi. Qo‘qon musiqali drama teatri sobiq shaxmat va shashka klubi maydonida Qo‘qon tarixiga oid eng sara asarlarini namoyish etib, shahrimiz madaniyati haqida badiiy uslubda ma’lumot beradi.