O‘zbekiston tumanida “Kambag‘allikdan farovonlik sari” dasturi doirasida oilalarni kambag‘allikdan chiqarish, ularni farovon turmush sharoitlari bilan ta’minlash borasida keng ko‘lamli ishlar amalga oshirilmoqda. Og‘ir hududga kiritilgan 7 ta mahallada fuqarolarga munosib turmush sharoitini yaratish yuzasidan manzilli ishlar olib borilmoqda. Jarayonlarda tomorqadan unumli foydalanish masalasiga alohida e’tibor qaratilyapti. Xususan, dastur asosida “Qayquobod” mahallasida ham aholi tomorqalarini sug‘orishga mo‘ljallangan suv qudug‘i qazilib, ishga tushirildi. Qiymati qariyb 430 mln so‘m bo‘lgan mazkur loyihaning hayotga tadbiq etilishi natijasida, 150 dan ziyod xonadon vakillarining ayni yo‘nalishdagi ko‘p yillik muammolari ijobiy hal etildi.