Qo‘qon shahridagi 7-umumiy o‘rta ta’lim maktabida yangi o‘quv binosi qurib bitkazilmoqda. Tashabbusli byudjet tizimidan ajratilgan 1.5 milliard so‘m mablag‘ evaziga "Zamon qurilish ta’mir" korxonasi tomonidan 150 o‘rinli ikki qavatli bino qurib bitkazilib, ayni paytda tashqi pardozlash ishlari olib borilmoqda. «Qurilish obyektlarini nogironligi bo‘lgan va hayot faoliyati cheklangan shaxslar hamda keksalar ehtiyojini inobatga olgan holda loyihalashtirish» shaharsozlik normalari va qoidalariga asosan yangi binoda lift, panduslar va imkoniyati cheklangan fuqarolar uchun boshqa shart sharoitlar ham nazarda tutilmoqda. Qo‘qon shahar hokimi maktabda olib borilayotgan ishlar bilan tanishib, mavjud muammo-masalalarni o‘rgandi. Xususan maktabda ta’lim samaradorligi, o‘qituvchilarning kasbiy malakasini oshirish bo‘yicha olib borilgan ishlar natijasida maktab bitiruvchilarining oliy ta’lim muassasalariga kirish ko‘rsatkichi o‘tgan yilga nisbatan 15 foizga oshgan. Qishki mavsum arafasida maktabdagi isitish tizimlari ham shahar shtabi mas’ullari tomonidan o‘rganilib, ayni paytda davlat-xususiy sherikchilik asosida aniqlangan kamchiliklarni bartaraf etish choralari ko‘rilmoqda. Marufjon Usmonov yangi barpo etilgan qozonxona va ko‘mir saqlash ombori, isitish tizimlarini ko‘zdan kechirib, maktabda mavsumga tayyorgarlik doirasida mavjud muammolar bilan qiziqdi. Mas’ullar bilan muloqot chog‘ida yoshlarning yuqori saviyada bilim olishlari uchun munosib shart-sharoitlar yaratish, ta’lim samaradorligi va maktab davomatini ta’minlash bo‘yicha ko‘rsatmalar berildi.