Mahalla guzarida tashkil etilgan tantanali marosimda Farg‘ona viloyati hokimi Xayrullo Bozorov, Qo‘qon shahar hokimi Marufjon Usmonov, Respublika ishchi guruhi a’zolari, viloyat va shahar sektorlari rahbarlari, qurilish tashkilotlari mutasaddilari va keng jamoatchilik vakillari ishtirok etdilar.
Xayrullo Bozorov davlatimiz rahbarining Farg‘ona viloyatiga tashrifi davomida berilgan ko‘rsatmalar ijrosi doirasida tuzilgan Respublika ishchi guruhi sa’y-harakatlari bilan Uzumzor mahallasida olib borilgan ulkan bunyodkorlik ishlari xususida to‘xtalib o‘tdi
Darhaqiqat juda qisqa vaqt ichida mahallada dastlabki bosqichda olib borilgan obodonlashtirish ishlari davomida 13 ming tonnadan ziyod chiqindilar olib chiqib ketilib, 500 metrdan ziyod ariq va zovurlar tozalandi.
Aholining kommunal muammolarini hal etish maqsadida 3 ta yuqori kuchlanishli transformator mukammal ta’mirlandi, 17 ta eski yog‘och elektr uzatish tayanchlari o‘rniga zamonaviy temir-beton tayanch ustunlari o‘rnatildi. 1800 metrdan ziyod eskirgan elektr tarmoqlar o‘rniga zamonaviy sip kabellari tortib kelindi.
Mahallada tabiiy gaz ta’minotini yaxshilash maqsadida hududdagi gaz taqsimlash stansiyasi mukammal ta’mirlandi va 1220 metr tabiiy gaz quvurlari yangilandi. 250 metrdan ziyod osma gaz quvurlari yer ostiga olindi.
Bundan tashqari mahallada 500 metrdan ziyod oqova tarmoqlari joriy ta’mirlanib, yashil maydonlardagi ekinlarni sug‘orish uchun 400 metr uzunlikdagi irrigatsiya tizimi barpo etildi.
Mahalla hududidan oqib o‘tadigan soyning 300 metrdan ziyod sathi betonlashtirildi, soy ustiga 2ta avtomobillar va bitta piyodalar ko‘prigi o‘rnatildi.
Mahalladagi 8 ta ko‘p qavatli uylarning 7300 kvadrat metr fasadi, 3860 kvadrat metr tomlari ta’mirlanib, 1704 kvadrat metr kirish yo‘laklari betonlashtirildi. Ko‘p qavatli uylarda istiqomat qiladigan fuqarolar xonadonlarida 379 kvadrat metr framuga va romlar yangilandi. Mahalla hududida 7 ta ayvon, 4ta tandir o‘choqlar, vorkaut, basketbol va voleybol maydonlari barpo etildi. Mahalladagi bolajonlar uchun ikkita bolalar maydonchasi to‘liq ta’mirlandi. Mahalla hududidagi 1000 metrdan ziyod ichki yo‘llar asfaltlashtirildi.
Mahalla hududida mahalla va uchastka inspektori idorasi, sartaroshxona, savdo do‘koni, kutubxona, tikuv sexi barpo etildi. Yangi mahalla servis kompaniyasi tashkil etilib, yangi bino bilan ta’minlandi. Mahallada chiqindilarni qabul qilish punkti barpo etildi.
Bu yerda olib borilgan ishlarda 500 dan ziyod quruvchilar ishtirok etib 70 ga yaqin maxsus texnikalardan foydalanildi.
Ayni paytda yangi sport zal qurilishi ham nihoyasiga yetkazilmoqda.
Tantanali tadbirda mahalla oqsoqollari ham davlatimiz rahbariga amalga oshirilgan ulkan bunyodkorlik ishlari uchun chuqur minnatdorchiliklarini izhor etdilar.
Farg‘ona viloyati hokimi Xayrullo Bozorov, Marufjon Usmonov hamda boshqa mutasaddi rahbarlar hamrohligida yangi mahalla binosining tantanali ochilish marosimida ishtirok etdi. Rahbarlar bu yerda yaratilgan sharoitlar bilan tanishib, mahalla mutasaddilari bilan muloqotda bo‘ldilar.
Mahallada yangi ish boshlagan tikuv sexi, shu yerda tashkil etilgan kutubxona bilan ham tanishgan mutasaddilar o‘quv kurslarini muvaffaqiyatli bitirib kelib, subsidiya asosida ishlab chiqarish dastgohlariga ega bo‘lgan ayol-qizlar bilan suhbatda bo‘ldilar.
Tantanali marosimda qadimgi an’analarimizga binoan yurtga osh berilib, aholi rasmiylar bilan muloqot chog‘ida yangitdan tug‘ilgan mahallasi uchun Prezidentimizga samimiy minnatdorlik bildirib, duolarida yurtimizga tinchlik-osoyishtalik, davlatimiz rahbariga uzoq umr tiladilar.