Yengil sanoat kolleji negizida tashkil etilgan Qo‘qon shahar kasb-hunar maktabi 2020-2021 o‘quv yili uchun 353 nafar 9-sinf bitiruvchilarini qabul qildi.
Maktabda o‘quvchilar ikki yil davomida umumiy o‘rta ta’lim yo‘nalishlari bilan bir qatorda, tikuvchilik, libos rassomi, avtomobillarni ta’mirlash chilangari, payvandchi, chilangar, to‘quv mashinalari operatori, sartaroshlik kabi 7 ta sohaning birida kasb-hunar o‘rganadilar.
O‘qishni tugatganidan so‘ng o‘rta maxsus ma’lumoti to‘g‘risidagi diplomga ega bo‘ladigan bitiruvchilar kasb-hunar maktabi bilan mutaxassislar tayyorlab berish bo‘yicha shartnoma tuzgan Qo‘qon EIZdagi va shahrimizning boshqa yetakchi korxonalariga ishga qabul qilinadilar.
Tantanali ochilish marosimida o‘qituvchilarga kelgusi faoliyatlarida ulkan muvaffaqiyatlar, o‘quvchilarga puxta bilim egallashlarini tilagan Marufjon Usmonov ushbu maktabning ochilishiga Muhtaram Yurtboshimizning mehnat bozori talablariga mos malakali kadrlarni tayyorlashga qaratilgan 2019 yil, 6 sentyabrdagi “Professional ta’lim tizimini takomillashtirishga doir qo‘shimcha chora-tadbirlar to‘g‘risida“gi farmoni asos bo‘lganini alohida ta’kidlab o‘tdi.
