“Янги Ўзбекистон – янгича дунёқараш” шиори остида, “Чет тилларини ўқитишда инновацион ёндашув” мавзусида ўтказилган тренингнинг очилиш маросимида Қўқон университети ректори Шерзод Мустафакулов бугунги кунда инглиз тили фан-техника, айниқса таълим, илм тили эканлиги, дунёда фойдаланиш даражасига кўра иккинчи ўриндалиги, бу тилда сўзлашувчилар сони 1,5 миллиардга етгани, ўқувчи-ёшлар, бўлажак талабаларга бу тилни мактабда пухта ўргатишнинг аҳамияти катта эканлигини таъкидлади.
Қўқон университети бу борада шаҳардаги 42 та умумтаълим мактаби билан интеграцияга тайёр эканлиги, умумтаълим мактабларининг инглиз тили ўқитувчилари учун ташкил этилган семинар-тренингда бу тилни ўқитишнинг Ирландия тажрибаси, дарсларни ташкил этишда инновацион воситалардан фойдаланиш юзасидан керакли кўникмалар берилишини маълум қилди.
Шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Шерзод Деҳқонов ҳам семинар-тренингнинг очилишида иштирок этиб, Қўқон шаҳар мактабларидаги таълим сифатини тубдан ошириш, шаҳарнинг илм-фан, маънавият ўчоғи сифатидаги мавқеини юксалтириш борасидаги режалар хусусида тўхталди. Барча ўқитувчиларни семинар-тренингларда олган кўникмалари асосида бор маҳоратлари билан таълим бериш, мактабларда тўгараклар фаолиятини жонлантириш, ўқувчилар ўртасида мактаблараро танловлар ўтказиш борасида фаолликка чорлади.
Шундан сўнг семинар иштирокчиларига университет спикерлари томонидан академик IELTS тестига интенсив-индивидуал тайёрланиш, инглиз тили дарсларини ташкил этишда инновацион онлайн воситалардан фойдаланиш, амалий машғулотларни ўйинлар орқали замонавий ўтказиш бўйича интерфаол асосда тренинг ўтказилди.
Семинар-тренинг 17-18 декабр кунлари ҳам давом этади.